Dërc y duviers di/dla viagiadëures

L viagiadëur/La viagiadëura à l dërt al trasport dal mumënt che l/la zapa tl mesun publich y à tla mans na cherta de viac che vel.

L viagiadëur/La viagiadëura aspieta pra la fermeda y mostra cun n sëni dla man la ntenzion de tò la coriera canche chësta ruva adalerch.

L viagiadëur/La viagiadëura ie respunsabl/respunsabla de tenì su la cherta y muessa cialé, danter l auter, che i dac che la cuntën posse unì liec.

I documënc de viac sun inuem muessa unì presentei, sun dumanda dl sciafer o dl personal de cuntrol, adum cun n documënt de recunescimënt che vel’. Per chi che ne à mo nia cumplì catordesc ani iel assé presenté l documënt de viac.

I/La passajires ie respunsabli/respunsables di danns gaujei ai mesuns, a terzi y a cosses.

La lueges da senté ie resservedes dantaldut ala persones cun dejabltà, al’ëiles che aspieta, ala jënt de tëmp y a viagiadëures cun mutons.

L trasport ne vën nia cunzedù ala persones che refudea la prescrizions n cont de orden y segurëza dl servisc, a chëles che ufënd la dezënza, che desturba i autri viagiadëures, che vënd bëns y prudoc sun l mesun de trasport, che cianta, sona o fej ativiteis semientes. Tl cajo che chësta despusizions ne vën nia respetedes y la situazion ie tela da descunsië che l viac vede inant, possa l sciafer o l personal de cuntrol damandé l ntervënt dla forzes dl orden.
Tl cajo che l viagiadëur y utënt dl servisc de trasport publich fej azions che mët tl pericul la segurëza y la regularità dl servisc, à l cuntrolëur o l sciafer la rejon, aldò de si valutazion persunela, de ti tò la cherta de viac tl cajo che chësta ie numinativa o de ne l lascé no furné inant, sce l se trata de na persona che à cumplì la majera età.
L Ufize cumpetënt stabilësc per tan giut che n ti tol la cherta y chësc tëmp va da n minim de n mëns a n mascim de n ann. Te chësc tëmp ne possel nia unì damandà na cherta de viac nueva y nianca n duplicat.
L resta a uni moda de ublianza per l viagiadëur/la viagiadëura de se tenì, sce n cajo, a uni despusizion dl personal de servisc.

Per cie che reverda l cumpurtamënt di/dla viagiadëures di servijes de trasport publich vel’ l titul II dl DPR di 11 de lugio 1980, n. 753 "Nuove norme in materia di polizia, sicurezza e regolarità dell'esercizio delle ferrovie e di altri servizi di trasporto" (Normes nueves tla materia de polizai, segurëza y regularità dl eserzize dla ferates y d’autri servijes de trasport), che vëij danora l’aplicazion de straufonghes aministratives tl cajo che la normes ne vënie nia respetedes.